کلام متینی Kalam e mateeni

برائے بزمِ حضور آفتابِ ملت

کلامِ متینی

کسی بھی حال میں ہو ذکر ان کا ہی کیا کرنا

مکینِ گنبدِ خضریٰ پہ جاں اپنی فنا کرنا

عدوئے رحمت کونین پر شدت سدا کرنا

جہاں میں ہر طرف یہ عام پیغام رضا کرنا

بہن بیوی ہو یا ماں باپ بیٹے بیٹیاں بھائی

محمد مصطفیٰ کے نام پر سب کو فدا کرنا

طریقِ تابعیں اور سیرت اصحاب اپنا کر

ہمارا کام ہے سرکار طیبہ سے وفا کرنا

تو ہی مالک ہے ہر شئی کا تو ہی خلاقِ عالم ہے

خداوندا مظالم کا جہاں سے خاتمہ کرنا

زمینِ کربلا سے آرہی ہے یہ صدا پَیہم

رسولِ پاک کی حرمت پہ تن،من،دھن،فدا کرنا

دیا ہے درس ہم کو یہ شہِ اختررضا خاں نے

جو گستاخِ پیمبر ہیں انہیں دل سے جدا کرنا

گنہگاروں کی صف میں یہ ترا شیدا بھی شامل ہے

شفاعت میری بھی اے شافع ِروزِ جزا کرنا

میں ہوں مجرم تمہارا سر پہ میرے بار عصیاں ہے

خبر گیری جزا کے دن مری یا مصطفیٰ کرنا

تمہاری فکر کی کھیتی ہری ہو جائےگی اک دن

متینی ہر گھڑی ذکر حبیب کبریا کرنا

شاداب متینی علیمی سدھارتھ نگری