قسم خدا کی ہے جنت حسین والوں کی

قسم خدا کی ہے جنت

 حسین والوں

 کی 

قسم خدا کی ہے جنت حسین والوں کی 

السلام علیکم ورحمت اللہ وبرکاتہ لیجئے آپ حضرات کی بارگاہ اقدس میں ایک خوبصورت مصرع طرح پیش کیا گیا ہے آئیں جم کر طبع آزمائی فرمائیں 

مصرع طرح 

قسم خدا کی ہے جنت حسین والوں کی 

قافیہ 

جنت امت رحمت شفاعت شفقت ہمت قوت طاقت عادت دولت تربت ہیبت غیبت خفت عزت عفت لعنت دعوت عداوت وغیرہ وغیرہ 

ردیف 

حسین والوں کی 

افاعیل 

مفاعلن فعلاتن مفاعلن فعلن 

25-7-2023

 بسم اللہ الرحمٰن الرحیم

الصلوِٰ والسلام علیک یا رسول اللہ

بزم حضور آفتاب ملت میں

 کہا گیا کلام

صاحب کلام شاعر اسلام جناب 

ماسٹر محمد نیاز عالم اسمٰعیلی

 بنارسی لدھیانہ

 پنجاب 

بیاں ہو کیسے حقیقت حسین والوں کی

ہے بالا فکر سے عظمت حسین والوں کی

نبی کا قرب ہے قربت حسین والوں کی

*قسم خدا کی ہے جنت حسین والوں کی*

بسالو دل میں محبت حسین والوں کی

ملے گی حشر میں قربت حسین والوں کی

بجا کے ڈھول بگا ڑو نہ عاقبت اپنی

یہ یاد رکھنا نصیحت حسین والوں کی

یزیدیوں نے رچی سازشیں ہزار مگر

نہ توڑ پائے وہ ہمت حسین والوں کی

امام عشق ومحبت کے درپہ آجاؤ

جو جان نی ہے فضیلت حسین ولوں کی

جہاں سے مٹ گیا نام و نشاں یزیدوں کا

ہر ایک سمت ہے شہرت حسین والوں کی

نہ چھوٹے دامن صبر و رضا کبھی عالم

یہی ہے سب کو نصیحت حسین والوں کی

تراوش قلم نیاز عالم اسمٰعیلی بنارسی لدھیانہ پنجاب

بزمِ حضور آفتاب ملت میں 

کہا گیا مکمل کلام

مصرع طرح

صاحب کلام حضرت علامہ مولانا ابوالاحسان مضطرارشدی صاحب قبلہ مدظلہ العالی والنورانی 

قسم خدا کی ہے جنت حسین والوں کی 

ہے  خوب اعلیٰ  قیادت  حسین والوں کی

زمانے بھر میں ہےشہرت حسین والوں کی 

ہمارے دل میں ہے چاہت حسین والوں کی

 ملی  ہے  ہم  کو  رفاقت حسین والوں کی

بڑھائی رب نے ہے عزت حسین والوں کی

قسم  خدا  کی  ہے  جنت حسین والوں کی

یزیدی  فوج  میں  بھگدڑ مچا کے رکھا ہے 

جب   آگئی  ہے  جماعت  حسین والوں کی 

بچھاڑ دیں جو فقط پل میں سورماؤں کو

ہے  ایسی شان  شجاعت حسین والوں کی

مٹایا   دہر   سے  نام  و نشاں یزیدوں کا

وہ ہےشجاعت و  ہمت حسین والوں کی

بھلا  نہ  پائے  گا  ان  کو  زمانہ محشر تک 

دلوں میں جن کےہےالفت حسین والوں کی

قسم   خدا  کی  وہ  ہرگز پنپ  نہیں سکتا 

 ہےجس کےدل میں عداوت حسین والوں کی 

ہے   ناز   اپنے   مقدر   پہ  اس لئے مضطر

ہے میرے دل میں محبت حسین والوں کی

نتیجہ فکر ابوالاحسان قادری مضطرارشدی غفرلہ مہاراشٹر9محرم الحرام سنہ چودہ سو پینتالیس ہجری بمطابق 28 جولائی سنہ 2023عیسوی بروز جمعۃ المبارکہ

بزم آفتاب ملت میں کہاگیامکمل کلام

صاحب کلام حضرت حافظ وقاری محمد اسلام اشرفی صاحب قبلہ مدظلہ العالی والنورانی 

ہےدل میں میرےمحبت حسین والوں کی

میں خوب کرتاہوں عزت حسین والوں کی

ہمارےلب پہ ہےمدحت حسین والوں کی

دل و جگرمیں ہے چاہت حسین والوں کی

سدا سنبھال کےرکھنادلوں میں تم اپنے

بہت ضروری ہےنسبت حسین والوں کی

یزیدیوں کےمقدرمیں ہےکہاں جنت

قسم خدا کی ہےجنت حسین والوں کی

رہ وفاسے کبھی ہم بھٹک نہیں سکتے

خداکرے گا حفاظت حسین والوں کی

یزیدی تکتے ہی رہ جاٸنگے قیامت میں

وہاں جب ہوگی شفاعت حسین والوں کی

نصیب ان کا بلندی پہ ہے مرےیارو

ہےپاٸ جس نےبھی قربت حسین والوں کی

نبی کے آل سےرکھتے ہیں دل میں جونفرت

انھیں پہ ہوتی ہے لعنت حسین والوں کی

حسن حسین کے صدقے میں آج بھی خادم

جہان بھرمیں ہے شہرت حسین والوں کی

از۔محمداسلام اشرفی ۔خادم۔امیٹھوی